Það var auðvitað löngu vitað að þegar Elísabet II andaðist myndi elsti sonur hennar, Karl, taka við embætti þjóðhöfðingja. Það var einmitt það sem gerðist í síðustu viku þegar drottningin lést, Karl tók við og varð Karl III.

Síðustu daga hefur stemmningin hjá starfsfólki hans ekki verið sérstaklega góð, eiginlega langt frá því.

Ástæðan er að starfsfólk í Clarence House, sem var embættisbústaður Karls og Camillu eiginkonu hans, fékk bréf á mánudaginn, á sama tíma og minningarathöfn um Elísabetu II stóð yfir í Skotlandi. The Guardian skýrir frá þessu.

Í bréfinu, sem var skrifað af Sir Clive Alderton, nánasta aðstoðarmanni Karls III, kemur fram að sumt af starfsfólkinu megi reikna með að missa vinnuna vegna breytinganna sem nú eru orðnar með fráfalli Elísabetar II.

Tæplega 100 manns vinna í húsinu, þar af hafa margir starfað þar áratugum saman. Flestir hafa unnið nær allan sólarhringinn síðustu daga til að tryggja að allt gengi snurðulaust fyrir sig þegar Karl varð konungur.

Heimildarmenn The Guardian segja að margt af starfsfólkinu hafi talið að það myndi fylgja Karli III yfir í nýja stöðu hans og hafði ekki minnsta grun um að svo yrði ekki.

„Allir eru brjálaðir,“ sagði ónafngreindur heimildarmaður við The Guardian og bætti við að fólki væri illa brugðið.

Í bréfinu kemur fram að þeim sem verður sagt upp standi til boða aðstoð við að finna aðrar stöður innan hirðarinnar, aðstoð við að finna vinnu utan hirðarinnar og að fólk fái aukagreiðslu ofan á starfslokasamning sinn.