Kim Jong-un, einræðisherra í Norður-Kóreu, lýsti því yfir í dag að sigrast hefði verið á kórónuveirufaraldrinum sem skall á landinu í vor. Hann felldi um leið allar sóttvarnaaðgerðir úr gildi.

Ríkisfréttastofan KCNA skýrði frá þessu. Segir hún að ekki eitt einasta smit hafi greinst frá 29. júlí.  Samkvæmt opinberum tölum þá létust 79 af völdum COVID-19 en 26 milljónir búa í landinu.

Hjá nágrönnunum í Suður-Kóreu hafa rúmlega 25.000 dauðsföll verið skráð en þar búa 52 milljónir.

Ekki er víst að opinberar tölur frá Norður-Kóreu séu sannleikanum samkvæmt. Yfirvöld þar í landi hafa yfirleitt ekki miklar áhyggjur af sannleikanum, aðeins því sem kemur einræðisstjórninni best.

KCNA segir að Kim Jong-un segi að miðað við fjölda látinna af völdum veirunnar í samanburði við önnur lönd þá sé um „kraftaverk“ að ræða.