Fyrir nokkrum vikum vaknaði Wanda Palmer, 51 árs, eftir að hafa verið í dái í tvö ár. Fljótlega eftir að hún vaknaði ræddi hún við lögregluna og skýrði frá hver réðst á hana fyrir tveimur árum.

Lögreglan fann hana á heimili hennar nærri Cottageville í Vestur-Virginíu í júní 2020. Ljóst var að ráðist hafði verið á hana, hún höggvin með sveðju eða öxi og skilin eftir til að deyja. CNN skýrir frá þessu.

Lögreglumenn töldu í fyrstu að hún væri dáin en áttuðu sig síðan á að hún andaði og var því enn á lífi. Árásarvopnið hefur ekki fundist.

Lögreglan segir að Palmer hafi sagt að bróðir hennar hafi ráðist á hana og veitt henni áverkana sem urðu til þess að hún lá í dái í tvö ár.

Vitni sagði hafa séð bróður Palmer, Daniel, við heimili hennar um miðnæturbil kvöldið áður en hún fannst helsærð. Lögreglan segir að ekkert annað hafi komið fram við rannsókn málsins sem gat gefið vísbendingu um hver hafi verið að verki. Engin símagögn, upptökur úr eftirlitsmyndavélum eða sjónarvottar hafi verið til staðar.

Lögreglan rannsakaði málið og hafði nokkra aðila í sigtinu en kærði enga.

Fyrir nokkrum vikum var henni tilkynnt að Palmer væri komin til meðvitundar og að hún vildi ræða við lögregluna. Hún gat í sjálfu sér ekki tjáð sig sjálf en hún gat svarað spurningum með já eða nei. Framburður hennar dugði til að lögreglan gat handtekið Daniel og kært fyrir morðtilraun og lífshættulega líkamsárás.