Hann sagðist ekki geta sagt til um þetta með fullri vissu en heilbrigðisyfirvöld séu að undirbúa þetta sem möguleika í framtíðinni. Einnig sé verið að íhuga að gefa fólki fjórða skammtinn af bóluefni, það er að segja örvunarskammt númer tvö.
„Það er of snemmt að segja til um hvernig þetta verður en ef þetta verður gert þá erum við reiðubúin til þess. Það er enginn vafi á að það eru bóluefnin sem eiga að bjarga okkur frá álagi vegna faraldursins í framtíðinni,“ sagði hann.
Virkni bóluefnanna er tímabundin, það er að segja áhrif þeirra dvína með tímanum og ekki er öruggt að fólk sleppi við smit þótt það sé bólusett en almennt veikist fólk minna ef það er bólusett.
Á fundinum var tilkynnt að ákveðið hafi verið að flýta örvunarbólusetningu 18 til 39 ára en eldri aldurshópar geta nú þegar fengið örvunarskammt.
Brostrøm sagði að í janúar eða febrúar verði skoðað hvort einhverjir hópar þurfi að fá fjórða skammtinn, engin ákvörðun hafi verið tekin um það enn sem komið er en málið verði skoðað vel.
Ísraelsk yfirvöld tilkynntu á þriðjudaginn að öllum eldri en sextíu ára verði boðið upp á fjórða skammtinn.
