Mörg ríki hafa áhuga á Grænlandi þessa dagana vegna legu landsins og hinna auðugu náttúruauðlinda. Skemmst er að minnast þess að Donald Trump, þáverandi Bandaríkjaforseti, vildi gjarnan kaupa þessa stærstu eyju heims. Því tóku bæði Danir og Grænlendingar fálega. En Rússar hafa einnig áhuga á Grænlandi og hafa sýnt mikinn áhuga á auknu samstarfi ríkjanna hvað varðar náttúruauðlindir, hráefni og menningarsamstarf.

Sermitsiaq skýrir frá þessu. Fram kemur að hægt sé að lesa um hugmyndir Rússa um samstarf í greinargerð um utanríkismál sem verður lögð fyrir grænlenska þingið, Inatsisartut, þann 28. október næstkomandi.

Vladimir Barbin, sendiherra Rússlands í Danmörku, staðfesti þennan vilja rússneskra yfirvalda í samtali við Sermitsiaq. „Rússland vill gjarnan nánara samband við Grænland. Við eigum svo margt sameiginlegt á Norðurheimskautasvæðinu að allir aðilar geta notið góðs af samvinnu því við höfum svo margt að læra af hver öðrum,“ sagði hann.

Hann sagði að í huga Rússa snúist þetta um að nýta auðlindirnar sem best, sérstaklega hvað varðar fiskveiðar.

Eins og áður sagði þá hafa Bandaríkin hug á að styrkja stöðu sína og auka áhrif sín á Grænlandi og Kína og ESB vilja einnig styrkja stöðu sína á svæðinu. ESB tilkynnti nýlega að sambandið opni skrifstofu í Nuuk en ekki var skýrt frá því hvenær hún verður opnuð.