Eigandi byggingaverktakafyrirtækisins PJ Verk, maður að nafni Algirdas Skucas, hefur verið úrskurðaður í tveggja ára atvinnurekstrarbann, í Héraðsdómi Reykjavíkur.
Fyrirtækið var stofnað árið 2021 var tekið til gjaldþrotaskipta þremur árum síðar. Algirdas var eini stjórnarmaður félagsins, framkvæmdastjóri þess og prókúruhafi.
Lýstar kröfur í búið voru rétt tæplega 15 milljónir króna og fyrir utan bíl sem Landsbankinn hafði lánað fyrir og skiptastjóri seldi úr búinu fékkst ekkert upp í lýstar kröfur. Meðal stórra kröfuhafa var Skatturinn.
Skiptastjóri krafðist atvinnurekstrarbanns yfir Algirdas á grundvelli þess að hann hefði enga tilraun gert til að takmarka tjón kröfuhafa með greiðslum upp í kröfur þeirra og vegna þess að greiðslur höfðu runnið af reikningi félagsins til einkanota Algirdas, samtals um sex milljónir króna. Hann hafi í raun tæmt reikninga félagsins í aðdraganda gjaldþrotsins.
Lögum samkvæmt eru skilyrði atvinnurekstrarbanns þau að viðkomandi einstaklingur teljist ekki hæfur til að stjórna félagi sem rekið er með takmarkaðri ábyrgð eigenda vegna skaðlegra eða óverjandi viðskiptahátta við stjórnun félagsins.
Var það mat dómara að skilyrði atvinnurekstrarbanns væru uppfyllt í máli Algirdas og var úrskurðað að hann sæti atvinnurekstrarbanni í tvö ár.
Úrskurðinn má lesa hér.
