Ákveðið hefur verið að starfsfólk á smitsjúkdómadeild Landspítalans verði í forgangi hvað varðar fyrstu bólusetningar gegn COVID-19. Fyrir jól var starfsfólkinu tilkynnt að það yrði ekki meðal þeirra fyrstu til að fá bóluefni. Þetta mæltist misvel fyrir hjá starfsfólki deildarinnar, sem er jafnan kölluð A7, því það hefur haft það hlutverk að hjúkra þeim allra veikustu sem hafa þurft að leggjast inn á sjúkrahús vegna COVID-19.

Fréttablaðið skýrir frá þessu í dag. Frá því að faraldurinn hófst hafa 316 verið lagðir inn á sjúkrahús vegna veikinda tengdum COVID-19.

Í gær fékk starfsfólk A7 síðan þau skilaboð að það yrði meðal þess framlínufólks sem verður bólusett í upphafi. Hugsanlegt er að lokið verði við bólusetningu framlínufólks fyrir árslok.

Það er kveðið á um forgangsröðun í bólusetningar í reglugerð en samkvæmt upplýsingum, sem Fréttablaðið fékk frá embætti sóttvarnalæknis, er nánari útfærsla á hvaða framlínufólk fær fyrst bóluefni í höndum stjórnenda Landspítalans. Um 1.000 heilbrigðisstarfsmenn teljast til framlínufólks.