Mörg hundruð strangtrúaðir gyðingar söfnuðust saman í Brooklyn í New York í gær til að mótmæla nýjum og hertum aðgerðum yfirvalda vegna heimsfaraldurs kórónuveirunnar. Þeir eru ósáttir við að Bill de Blasio, borgarstjóri, hafi hert aðgerðirnar.

Frá og með gærdeginum var íbúum ákveðinna hverfa í borginni gert að sæta strangari takmörkunum en aðrir borgarbúa vegna smithlutfallsins í hverfunum. Þessar hertu aðgerðir ná til hverfa gyðinga en þar hefur smitum fjölgað mikið.

Meðal þeirra ráðstafana sem gripið hefur verið til er að loka mörg hundruð skólum og fyrirtækjum. Einnig hefur verið sett bann við að fólk safnist saman í stórum hópum og aðeins 10 mega koma saman í bænahúsum og kirkjum hverju sinni.

Það er einmitt þetta síðastnefnda sem fer verst í hina strangtrúuðu gyðinga að sögn CBS News. Nú stendur Sukkot hátíð gyðinga yfir og telja gyðingarnir þessar takmarkanir skemma fyrir hátíðarhöldunum.

Mótmælendur kveiktu bál, hrópuðu „Jewish lives matter“ og lýstu yfir stuðningi við Donald Trump forseta. Enginn var handtekinn að sögn lögreglunnar en Bill de Blasio hafði tekið skýrt fram að fast verði tekið á brotum á þeim reglum sem settar hafa verið.