Svalbarði, sem er eitt nyrsta byggða ból heims, er eitthvað sem við tengjum venjulega við kulda, snjó og ísbirni. En sumarið var mjög heitt þar, raunar það hlýjasta frá upphafi mælinga.

Talsmaður norsku veðurstofunnar sagði að hitinn á Svalbarða hafi verið öfgakenndur í sumar og hækkandi hitastig hafi verið mjög greinilegt þar síðustu 30 ár. Þróun síðustu 30 ára sé allt önnur en þróunin 90 ár þar á undan. Það sé greinilegt að sumrin verði sífellt hlýrri og að sumir í ár hafi verið mjög óvenjulegt.

Skráning veðurathugana á Svalbarða hófst 1899 og sló hitinn í sumar öll met. Meðalhitinn yfir sumarmánuðina þrjá er breytilegur á milli ára. Fram til 1990 sveiflaðist hann yfirleitt um hálfa til eina gráðu á milli ára. Frá 1997 hefur meðalhitinn ekki farið undir meðaltalið eitt einasta sumar.

Hlýjasti dagurinn í sumar var 25. júlí þegar hitinn mældist 21,7 gráða.

Skýringin á þessum mikla hita eru heitir loftstraumar frá Rússlandi. Frekar svalt var í Vestur-Evrópu og það þýðir að hlýtt hefur verið austar í álfunni. Þessi hiti virðist hafa fengið smá „spark“ þannig að hann barst enn lengra norður og náði til Svalbarða.