Liverpool er Englandsmeistari árið 2020 eftir leik Chelsea og Manchester City í gærkvöld. Það hefur lengi legið í loftinu að Liverpool yrði meistari en liðið hefur aðeins tapað einum leik í deildinni. Manchester City þurfti að vinna Chelsea í gær til að tefja enn frekar en liðið tapaði 2-1 á Stamford Bridge.

Þetta er fyrsti sigur Liverpool í ensku úrvalsdeildinni en liðið vann síðast árið 1990 þegar úrvalsdeildin var ekki stofnuð. Liverpool er með 86 stig á toppi deildarinnar, 23 stigum á undan City sem vann titilinn í fyrra. Afrek Liverpool er magnað en sjö umferðir eru eftir af deildinni.

Það er sárt fyrir erkifjendur Liverpool í Manchester United að horfa upp á liðið verða meistara. United hefur verið í krísu síðustu ár á meðan Liverpool blómstrar.

Sigurður Hlöðversson stuðningsmaður Manchester United spáði fyrir um tímabilið síðasta haust og bað fólk um að taka skjáskot af því. Skjáskotið sem margir tóku kemur nú í bakið á honum.

„Liverpool er aldrei að fara að vinna þessa deild. Staðfest. Takið Screen shot,“ skrifaði Siggi Hlö brattur og hafði enga trú á lærisveinum Jurgen Klopp.