Eftir vel heppnaða fæðingu breyttist gærdagurinn í algjöra martröð fyrir nýbakað sænska móður. Hún hafði eignast barn sitt á Hunddinge sjúkrahúsinu í Stokkhólmi. Skyndilega vék maður sér að henni inni á fæðingardeildinni og tók barnið úr örmum hennar og fór á brott með það. Hann ók á brott, ásamt tveimur samverkamönnum sínum, í leigubíl.

Barnið fæddist fyrir tímann og því höfðu læknar miklar áhyggjur af heilsu þess. En sem betur fer tókst lögreglunni að finna barnið fljótlega og flytja aftur á sjúkrahúsið, þá var um klukkustund liðin síðan það var hrifsað úr örmum móður sinnar.

Aftonbladet segir að það hafi verið ættingi konunnar sem rændi barninu.

Tveir hafa verið handteknir vegna málsins og þess þriðja er leitað. Lögreglan sagði í nótt að barninu heilsist vel.