Ugla sem hefur glatt reglulega gesti Central Park í New York drapst á dögunum og syrgja borgarbúar hana mjög.
Flaco hét fuglinn fallegi sem drapst eftir að hafa flogið á glugga í nærliggjandi fjölbýlishúsi. Flaco var 13 ára að aldri þegar að endalokunum kom en í tólf ár var fuglinn innilokaður í Central Park dýragarðinum. Það var allt þar til að skemmdarvargar brutu búrið hans sem gerði það að verkum að fuglinn flúði.
Flaco leitaði þó ekki langt og hélt sig áfram til í Central Park og gæddi sér þar á rottum og dúfum sem New York-búar voru ánægðir með. Fyrst um sinn var allt reynt til þess að klófesta Flaco að nýju en það féll illa í kramið hjá almenningi sem kunni að meta söguna um ugluna sem slapp úr prísunda mannanna og fékk að njóta frelsisins.
Frelsið var þó ekk fegurra en svo að með hverjum munnbita hrakaði heilsu Flaco. Krufning leiddi nefnilega í ljós að uglan glæsilega þjáðist af svæsnu dúfnaherpesi og þá greindust fjórar tegundir af rottueitri í fuglinum. Telja rannsakendur að Flaco hafi verið við dauðans dyr af þessum völdum þegar hann klessti á fjölbýlishúsið og fékk skjótan dauða.
Flaco var af arnaruglutegund en slíkar uglur lifa í um 20 ár frjálsar en geta orðið allt af 60 ára séu þær í haldi manna. Frelsið í stórborginni stytti því lífaldur Flaco verulega.
