Berlingske skýrir frá þessu. Umsóknum 12 um vegabréfsáritun til Danmerkur hafði verið hafnað og 11 vildu komast til Bretlands frekar en Danmerkur. Þar til í júní höfðu aðeins 5 afganskir túlkar fengið hæli í Danmörku en 139 höfðu sótt um hæli.
Poul Hauch Fenger, lögmaður og sérfræðingur í málefnum hælisleitenda og fyrrum starfsmaður Mannréttindastofnunar SÞ, sagði í samtali við Berlingske að hann hafi aldrei áður séð fyrirkomulag sem þetta. Danir hafi greitt fyrir að losna við lagalega ábyrgð á túlkunum með því að greiða Bretum fyrir að taka við þeim.
Ekki hafa fengist upplýsingar um hversu mikið Danir greiddu Bretum. Berlingske segir að upphæðin hafi verið reiknuð út frá hvað það kostaði Breta að fara yfir skjöl túlkanna og flytja þá frá Afganistan auk kostnaðar við aðlögun þeirra að bresku samfélagi og félagslegar bætur til þeirra næstu fimm árin.
Túlkarnir unnu fyrir danska herinn í Afganistan en voru ráðnir til starfsins af Bretum. Þeir klæddust þó dönskum einkennisfatnaði og sumir fengu laun sín greidd beint frá umsjónarmanni túlkamála danska hersins.
