Vladímír Pútín, Rússlandsforseti, er sagður óttast valdarán eða að reynt verði að ráða hann af dögum og því er líf hans allt öðruvísi nú en fyrir nokkrum árum.

CNN og Financial Times skýra frá þessu og vitna í skýrslu frá evrópskri leyniþjónustu en báðir miðlarnir hafa séð skýrsluna.

Rússneska leyniþjónustan er sögð hafa fækkað mjög þeim stöðum sem Pútín getur heimsótt. Bæði hann og fjölskylda hans eru hætt að fara á heimili sín í Moskvu og sumardvalarstaðinn í Valdai, sem er á milli Sankti Pétursborgar og Moskvu.

Í leyniþjónustuskýrslunni kemur fram að Pútín hafi ekki heimsótt eina einustu herstöð á þessu ári. Frá 2022 hefur hann að sögn einnig dvalið margar vikur í einu í neðanjarðarbyrgjum, oft í Krasnodar-héraðinu.

Pútín sést þó enn oft á almannafæri en rússnesk yfirvöld hafa ekki staðfest neitt af því sem fram kemur í skýrslunni.