Við landamæri Mexíkó og Bandaríkjanna hefur yfirleitt farið mest fyrir fólki sem flýr náttúruhamfarir í Mið-Ameríku og glæpaölduna í Mexíkó. En nú er ný tegund flóttamanna farin að koma í auknum mæli að landamærunum. Þetta eru svokallaðir „heimsfaraldurs flóttamenn“ sem koma frá Brasilíu, Venesúela, Ekvador og jafnvel Indlandi. Þeir flýja sjúkdóma, dauða, slæmt efnahagsástand og almennt slæm lífsskilyrði en allt hefur þetta versnað í heimsfaraldrinum.
Samkvæmt tölum frá bandarískum yfirvöldum þá komu 12.500 flóttamenn frá Ekvador til Bandaríkjanna í mars en þeir voru 3.568 í janúar. Tæplega 4.000 Brasilíumenn komu til landsins í mars og um 3.500 Venesúelabúar. Í janúar komu um 300 manns frá hvoru þessara landa.
Á undanförnum mánuðum hafa flóttamenn frá 160 þjóðríkjum verið skráðir við landamærin. Margir þeirra koma frá löndum þar sem heimsfaraldurinn hefur nánast knésett þau, bæði efnahagslega og félagslega.
Dæmi eru um að stöndugir Indverjar og stöndugt fólk frá öðrum Asíuríkjum hafi flogið til Mexíkóborgar og síðan tekið rútu til bandarísku landamæranna. The New York Times skýrir frá þessu.