Evrópskar peningaprentvélar stóðu ekki ónotaðar á síðasta ári ef miða má við mikla ásókn fólks í reiðufé. Evrópski seðlabankinn, ECB, telur að fólk geymi nú mikið magn af seðlum heima hjá sér. Ástæðan er heimsfaraldur kórónuveirunnar.

Það sama gerðist í kringum aldamótin þegar líkur voru taldar á að tölvukerfi heimsins myndu hrynja því tölvur gætu ekki ráðið við að ártalið breyttist úr 99 í 00. Þetta gerðist síðan aftur í tengslum við fjármálakreppuna 2008 og svo núna þegar heimsfaraldurinn skall á.

Í greiningu ECB kemur fram að eftirspurn eftir seðlum hafi aukist í faraldrinum. Hún er sögð hafa snaraukist á vormánuðum 2020 og hafi síðan verið mikil það sem eftir lifði árs.

Fram kemur að í desember 2018 og 2019 hafi bankinn prentað evruseðla fyrir andvirði 61 milljarðs. Í desember 2020 var prentað fyrir andvirði 141 milljarðs. Á sama tíma hefur streymi seðla inn og út úr seðlabönkum í álfunni dregist saman. Telur bankinn þetta benda til að eftirspurnin eftir seðlum byggist á varúðarráðstöfunum almennings vegna óvissuástands.

Allir þessir seðlar hafa ekki verið notaðir til að greiða fyrir vörur og þjónustu og liggja því væntanlega á heimilum fólks en um helmingur þeirra er talinn enda í löndum þar sem lítið traust er á gjaldmiðli heimalandsins og fólk kaupi sér því evrur til að tryggja sig.

Útreikningar ECB sýna að hver fullorðinn íbúi á evrusvæðinu sé nú með á milli 1.270 og 2.310 evrur heima hjá sér.