Sérfræðingar segja mjög líklegt að norður-kóreskir tölvuþrjótar, sem starfa á vegum einræðisstjórnarinnar, hafi reynt að stela gögnum um bóluefni Pfizer og BioNTech til að selja þau. Suður-kóreska leyniþjónustan skýrði frá þessu á þriðjudaginn.

Yonhap skýrir frá þessu. Ekki kemur fram hvenær reynt var að stela gögnunum eða hvort tölvuþrjótunum hafi tekist að stela þeim. Talsmenn Pfizer í Asíu og Suður-Kóreu hafa ekki tjáð sig um málið.

Ha Tae–keung, þingmaður sem á sæti í öryggismálanefnd suður-kóreska þingsins, staðfesti að tilraun hafi verið gerð til að stela þessum gögnum. „Þetta var tilraun til að stela bóluefnatækni og meðferðartækni í tölvuárás og brotist var inn hjá Pfizer,“ sagði hann.

Sérfræðingar telja líklegast að Norður-Kóreumenn hafi reynt að stela þessum gögnum til að selja þau áfram. Ekki sé líklegt að Norður-Kórea hafi ætlað að nota þau til að þróa eigin bóluefni.

Njósnir, sem beinast gegn heilbrigðisyfirvöldum, bóluefnarannsóknum og lyfjaframleiðendum, hafa aukist í heimsfaraldrinum. Á síðasta ári voru norður-kóreskir tölvuþrjótar sakaðir um að hafa brotist inn í tölvur minnst tíu heilbrigðisfyrirtækja og stofnana, þar á meðal Johnson & Johnson og AstraZeneca.