Í gær voru þrír ungir menn skotnir við verslun Meny á Nørre Alle í Kalundborg í Danmörku. Einn þeirra lést á vettvangi af völdum áverka sinna en hinir tveir liggja nú á sjúkrahúsi og er ástand þeirra mjög alvarlegt að sögn lögreglunnar.

Lögreglunni barst tilkynning um að skotum hefði verið hleypt af við verslun Meny klukkan 18.12 í gær. Ekstra Bladet segir að skömmu síðar hafi verið tilkynnt um logandi bíl á Eskebjergvej. Lögreglan telur ekki útilokað að sá bíll tengist skotárásinni en það er algengt eftir árásir sem þessar að árásarmennirnir kveiki í bílum þeim sem þeir nota við árásirnar til að eyða sönnunargögnum.

Lögreglan hefur nú biðlað til almennings um upplýsingar varðandi málið og eru allir þeir sem tóku eftir einhverju athyglisverðu á morðvettvanginum eða á Eskebjergvej síðdegis í gær hvattir til að gefa sig fram.

Lögreglan veit ekki enn deili á fórnarlömbunum. Vettvangsrannsókn hefur staðið yfir í alla nótt.

Uppfært klukkan 07.05

Lögreglan staðfesti fyrir nokkrum mínútum að tveir væru látnir eftir skotárásina og að sá þriðji sé í lífshættu.