Andrea Björk Hannesdóttir, dýralæknir hjá Dýrheimum, segir nammimenningu hafa vaxið mjög að undanförnu hjá dýraeigendum, einkum hundaeigendum. Þetta bitni á heilsu þeirra og veldur ýmis konar vandamálum.

„Þetta er að aukast alveg svakalega. Þessi nammimenning eins og ég kalla það,“ segir Andrea í viðtali í Bítinu á Bylgjunni í morgun. En hún var þar til viðtals ásamt Ólafi Eini Birgissyni sölustjóra Dýrheima.

Andrea sagðist hafa tekið eftir aukningu heilsufarsvandamála hjá dýrum. Meðal annars ýmis húðeinkenni, ofnæmiseinkenni og meltingarfæraeinkenni. Algengt væri að hundar væru að fá niðurgang.

„Ég set svolítið sama sem merki þarna á milli,“ segir hún um aukna nammigjöf og þessi heilsufarsvandamál.

Hún segir samfélagsmiðla hafa mikil áhrif. Fólk sé „spammað“ með sífelldum auglýsingum og umfjöllunum um dýranammi, einkum hundanammi.

„Ég get varla skrollað niður án þess að fá endalausar nammi og fóðurauglýsingar,“ segir hún. „Ég myndi vara fólk við að prófa of mikið. Stöðugleiki í fóðri er númer eitt, tvö og þrjú þegar við erum að hugsa um heilsu dýra.“

Með því að gefa þeim of margar tegundir gætu dýrin fengið ýmis konar bólgur og jafn vel myndað óþol. Þá verði fólk einnig að hafa í huga að dýrin geta orðið matvandari og ekki viljað hvað sem er.

„Þetta eru ótrúlega klár dýr. Þau eru fljót að spila á okkur,“ segir Andrea.

Eins og áður segir er vandamálið mest hjá hundaeigendum. Fólk gefi köttum minna af aukabitum. Einna helst smá harðfisk eða rjóma.