Um helgina lögðu bresk stjórnvöld algjört bann við komum fólks frá Danmörku til Bretlands og einnig var lagt bann við að flugvélar, sem koma frá Danmörku, fái að lenda í Englandi. Ástæðan er að stökkbreytt kórónuveira hefur fundist í dönskum minkum og hefur hún borist í fólk. Þetta stökkbreytta afbrigði getur, ef allt fer á versta veg, sett okkur aftur á byrjunarreit í baráttu okkar við veiruna því stökkbreytta afbrigðið er ónæmt fyrir þeim bóluefnum sem eru í þróun.

Enn sem komið er er vöruflæði á milli Danmerkur og Bretlands í ágætu lagi en Bretar eru þó farnir að hafa áhyggjur af yfirvofandi skorti á beikoni sem er ómissandi hluti af „enskum morgunverði“. The Sun skýrir frá þessu.

Ástæðan er að fjórðungur alls þess svínakjöts, sem Bretar borða, kemur frá Danmörku og með ferðabanni bresku stjórnarinnar er þrengt töluvert að vöruflutningum á milli landanna.

Danskir vöruflutningabílstjórar mega ekki lengur koma til landsins og því eru flutningabílarnir sendir án bílstjóra með ferjum til Bretlands þar sem aðrir bílstjórar taka við þeim. Sami háttur er hafður á þegar bílarnir fara aftur til meginlandsins. Hætt er við að þetta muni hægja á vörustreyminu og hafa margir Bretar áhyggjur af beikonskorti sem gæti orðið vegna þessa. Það er því spurning hvort þeir fari að hamstra beikon eins og margir hafa hamstrað salernispappír og ger.