Frans páfi segir að slúður sé „verri plága en COVID“. Þetta er ekki í fyrsta sinn sem hann hefur fordæmt slúður en fyrrgreind ummæli lét hann falla í bænum sínum síðasta sunnudag.

Hann sagði einnig að djöfullinn væri slúðrari sem hafi að markmiði að kljúfa kaþólsku kirkjuna.

„Slúður lokar á hjarta samfélagsins, lokar á samstöðu kirkjunnar,“

sagði hann að sögn CNN.

„Mesti slúðrarinn er djöfullinn sem er alltaf að segja eitthvað slæmt um aðra af því að hann er lygari sem reynir að kljúfa kirkjuna, gera fólk fráhverft henni. Gerið það, bræður og systur, reynum að slúðra ekki. Slúður er verri plága en COVID,“

bætti hann við.

Fyrir fjórum árum varaði hann presta og nunnur við að kynda undir „hryðjuverkum slúðurs“ og hvatti þau til að standast freistinguna um að dreifa sögum. Best væri að bíta bara í tunguna ef þörf fyrir að slúðra kæmir yfir mann.