Málið vakti mikla athygli, en eins og Pressan greindi frá á dögunum fann kona minniskort úti á götu í Anchorage í Alaska sem innihélt býsna óhugnanlegar myndir og myndband.
Myndböndin og ljósmyndirnar sýndu mann berja og kyrkja konu í hótelherbergi. Á einu myndbandinu mátti einnig sjá mann vefja hreyfingarlausri konunni inn í teppi áður en henni var komið fyrir í skotti bifreiðar. Nokkrum dögum síðar fannst kvenmannslík og reyndist það vera lík konunnar sem sást á minniskortinu.
Rannsókn málsins leiddi til handtöku Brians en fórnarlambið í málinu var þrítug kona, Kathleen Jo Henry, sem er af frumbyggjaættum Alaska. Við yfirheyrslur játaði hann að hafa drepið Kathleen en hann játaði einnig morð á annarri konu.
Í frétt Anchorage Daily News kemur fram að Brian hafi játað að hafa skotið 52 ára konu, Veronicu Abouchuk, til bana. Veronica, sem var einnig af frumbyggjaættum, sást síðast í júlí 2018 en ekki var tilkynnt um hvarf hennar fyrr en í febrúar á þessu ári. Tveimur mánuðum síðar fannst lík hennar.
Á blaðamannafundi sem lögregla hélt í gær vegna málsins kom fram að lögregla útilokaði ekki að fórnarlömbin kynnu að vera fleiri.
