Óhætt er að segja að rannsóknardeild lögreglunnar þar í borg hafi haft í nógu að snúast undanfarna daga eftir að minniskort með óhugnanlegu innihaldi rataði á borð lögreglu.
Það var þann 30. september síðastliðinn að kona, sem var á gangi úti á götu í Anchorage, rak augun í umrætt minniskort þar sem það lá eins og hvert annað rusl úti á götu. Á minniskortinu var stutt setning sem eflaust rennur konunni seint úr minni: „Homicide at midtown Marriott“ eða „Morð á Marriott í miðborginni“. Alaska Public Media greinir frá þessu.
Konan kom minniskortinu í hendur lögreglu sem skoðaði innihaldið. Á kortinu voru nokkur myndbönd og ljósmyndir sem sýndu mann berja og kyrkja konu í hótelherbergi. Á einu myndbandinu mátti einnig sjá mann vefja hreyfingarlausri konunni inn í teppi áður en henni var komið fyrir í skotti bifreiðar.
Innihaldið kom lögreglumönnum svo á óvart að í fyrstu lék vafi á hvort myndböndin og myndirnar hefðu verið sviðsettar. Á þessum tímapunkti hafði lögreglu ekki borist tilkynning um alvarlega líkamsárás eða morð, en það átti eftir að breytast.
Tveimur dögum eftir að lögregla fékk minniskortið í hendurnar fannst kvenmannslík í borginni. Lögregla vissi ekki nánari deili á konunni en öll ummerki bentu til þess að um sömu konu væri að ræða og sást í myndbandinu. Lögregla hefur lagt nótt við dag við rannsókn málsins og á blaðamannafundi í gær var tilkynnt að lögregla hefði handtekið og ákært 48 ára karlmann sem grunaður er um morðið.
Maðurinn sem um ræðir heitir Brian Steven Smith og er af suðurafrísku bergi brotinn en hefur verið búsettur í Anchorage um nokkurt skeið. Eftir að hafa skoðað hin óhugnanlegu myndbönd ofan í kjölinn könnuðust einhverjir lögreglumenn við hann vegna annarra mála. Þá á hann samskonar bifreið og sást í einu af myndböndunum.
Lögregla telur að morðið hafi verið framið í byrjun septembermánaðar á TownePlace Suites by Marriott, hóteli í Anchorage. Ekki liggur fyrir hvernig Brian glataði minniskortinu eða hvort hann hafi haft einhver tengsl við fórnarlambið. Hann er nú í haldi lögreglu og hefur verið ákærður fyrir morð af fyrstu gráðu.