Landsréttur hefur staðfest dóm yfir Eírík Hilmarssyni fyrir meiriháttar skattalagabrot í rekstri hreingerningarþjónustufyrirtækisins PURUS. Auk 10 mánaða skilorðsbundins fangelsisdóms hlýtur hann rúmlega 69 milljón króna sekt.
DV greindi frá dómi Héraðsdóms Reykjaness í apríl í fyrra. En auk Eiríks var Gísli Rúnar Sævarsson, sakfelldur og hlaut 18 mánaða skilorðsbundinn dóm og rúmlega 69 milljón króna sekt.
Félagið PURUS er nú gjaldþrota og hefur verið afskráð. Voru stjórnendur fyrirtækisins sakfelldir fyrir að hafa ekki staðið skil á virðisaukaskattskýrslum fyrir rúmlega eins árs tímabil frá vori 2019 fram á haust 2020 og ekki greitt virðisaukaskatt fyrir rétt rúmlega 40 milljónir króna. Einnig fyrir að hafa ekki staðið skil á staðgreiðslu opinberra gjalda fyrir rúmlega 28 milljónir.
Mál Eiríks fór fyrir Landsrétt sem staðfesti að mestu dóminn en hækkaði örlítið sektina. Verði sektin ekki greidd til ríkissjóðs innan fjögurra vikna frá uppkvaðningu dómsins bætist 360 daga fangelsisvist við hann.
Þá var Eiríki gert að greiða allan áfrýjunarkostnað málsins, það er tæplega 2 milljónir króna.
