Í morgun birti DV frétt um að SOS Barnaþorpin væru að leita að konu að nafni Hafdís. Ástæða leitarinnar var sú að til samtakanna leitaði indversk kona, Ambika sem ólst upp í SOS barnaþorpinu í Greenfields á Indlandi árin 1993 til 2012. Hafdís var SOS-foreldri hennar og styrkti Ambiku í gegnum SOS og sendi henni reglulega kort í pósti, síðast fyrir um 10 árum. Nú er Ambika á leið til Íslands ásamt eiginmanni sínum og langar að hitta Hafdísi.

Sjá einnig: Ambika er á leið til Íslands – Leitar að Hafdísi og langar að þakka henni fyrir stuðning

DV barst rétt í þessu tölvupóstur frá upplýsingafulltrúa SOS Barnaþorpanna, Hans Steinari Bjarnasyni. Þar kemur fram að Hafdís er fundin, hún er í sumarbústað og var því ekki búin að sjá fréttir um að hennar væri leitað.

„Mig langaði bara að láta þig vita að Hafdís er fundin. Ábending ættingja hennar kom okkur á sporið. Hún varð alveg himinlifandi þegar ég tilkynnti henni að von væri á Ambiku til Íslands. Hún er stödd úti á landi í sumarbústað og hafði ekki heyrt af leitinni af sér. Hún er lítið á netinu og hafði hvorki séð Facebook færsluna né fréttir af leitinni að henni. Henni varð svo mikið um að heyra það að hún sagðist þurfa tíma til að meðtaka þetta allt saman, bæði að hún myndi fá þetta tækifæri til að hitta Ambiku og að hún væri orðin að fréttaefni í fjölmiðlum. Hún hafði þó mikla ánægju af því.

Mestu ánægjuna hafði Hafdís þó af því að sjá hvað stuðningur hennar hafði greinilega gert Ambiku gagn því hún vissi að hún væri langskólagengin og búin að koma sér vel fyrir í lífinu. Ég hef tilkynnt Ambiku um að Hafdís sé fundin og bíð nú eftir að heyra aftur frá henni.“

Þeir sem vilja kynna sér starfsemi SOS Barnaþorpanna og hugsanlega gerast styrktarforeldri geta fundið allar upplýsingar hér.