Landsréttur hefur snúið við dómi Héraðsdóms Reykjavíkur í máli mæðgna sem Hundaræktarfélag Íslands (HRFÍ) setti í 15 ára bann. Þarf HRFÍ að greiða þeim miskabætur vegna úrskurðar siðanefndar sem hefur verið felldur úr gildi.

Talsvert hefur verið fjallað um málið í fjölmiðlum. Þann 25. Janúar árið 2022 úrskurðaði siðanefnd HRFÍ um brottvísun mæðgna sem rækta Schäfer hunda úr félaginu í 15 ár og sviptingu ættbókarskírteinis og ræktunarnafni. Ástæðan var að sögn siðanefndar það að mæðgurnar hefðu falsað ættbókarskráningar og skráð ranga ræktunartík á pörunarvottorð. Einnig að þær hefðu neitað að svara spurningum framkvæmdastjóra HRFÍ og sakað hann um refsiverða háttsemi með meiðyrðum.

Mæðgurnar stefndu félaginu en þann 14. febrúar árið 2024 dæmdi Héraðsdómur Reykjavíkur HRFÍ í vil. Það er sýknaði félagið af kröfum þeirra og gerði þeim að greiða málskostnað.

Landsréttur sneri þeim dómi við í dag og er HRFÍ gert að greiða hvorri um sig 200 þúsund krónur í miskabætur og 600 þúsund í málskostnað.

Taldi rétturinn viðurlögin sem mæðgunum var gert að sæta allt of ströng. Fyrir slík brot væri vanalegt að setja félagsmenn í 6 til 24 mánaða bann, jafn vel fyrir ítrekuð brot sem hafi ekki verið í tilfelli mæðgnanna. Þá hafi ekki mátt birta nöfn þeirra í úrskurðinum.