Inga Sæland, formaður Flokks fólksins, rekur ástæðu þess að hún ákvað að stofna Flokk fólksins fyrir tæpum níu árum í aðsendri grein í Morgunblaðinu í dag.

Flokkur fólksins vann ákveðinn sigur í kosningunum á laugardag og fékk 13,8% atkvæða og tíu þingmenn kjörna. Bendir margt til þess að flokkurinn muni fara í ríkisstjórn með Samfylkingu og Viðreisn.

Í grein sinni segir Inga að fyrir tæpum níu árum, skömmu áður en hún stofnaði Flokk fólksins, hafi hún heyrt af þá nýútkominni skýrslu Unicef á Íslandi um fátækt barna.

„Þar kom fram að 9,1% barn­anna okk­ar leið mis­mik­inn skort. Ég varð gjör­sam­lega miður mín og ég hét því þá að ég myndi gera allt sem í mínu valdi stæði til að út­rýma þess­ari óafsak­an­legu fá­tækt í okk­ar ríka landi. Í kjöl­farið stofnaði ég Flokk fólks­ins.“

Ávallt bætt sig á milli kosninga

Inga bendir á að flokkurinn hafi nú gengið í gegnum fernar alþingiskosningar og ávallt bætt við sig töluverðu fylgi milli kosninga.

„Það má með sanni segja að Flokk­ur fólks­ins sé einn helsti sig­ur­veg­ari ný­geng­inna kosn­inga enda bætti hann við sig fjór­um þing­mönn­um,“ segir Inga sem gerir skoðanakannanir í aðdraganda kosninganna einnig að umtalsefni í grein sinni.

„Enn einu sinni skilaði niðurstaða kosn­inga meira kjör­fylgi til Flokks fólks­ins en nokk­ur skoðana­könn­un hafði spáð, en hæst feng­um við spá um 13,1% fylgi í óbirtri könn­un Gallup, sem RÚV greindi frá hinn 22. nóv­em­ber. Niðurstaða kosn­ing­anna var að 13,8% allra greiddra at­kvæða til­heyrðu Flokki fólks­ins.“

Réttlát og hreinlynd ríkisstjórn

Inga kveðst trúa því að nú verði raunverulegar breytingar og bjartari tímar fram undan fyrir alla þá sem eiga um sárt að binda.

„Fyr­ir börn­in okk­ar og fjöl­skyld­urn­ar sem glíma við fá­tækt og fyr­ir þá sem eru á biðlist­um eft­ir hjálp. Við búum í ríku landi þar sem öll­um á að líða vel. Það er í hönd­um okk­ar stjórn­mála­manna að jafna kjör­in og koma í veg fyr­ir að nokk­ur þurfi að líða skort.“

Inga er þakklát fyrir þær kveðjur sem hún hefur fengið meðan á kosningabaráttunni stóð og ekki síður eftir að talið var upp úr kjörkössunum.

„Sól­in sem skær­ast skín í lok dags er kær­leik­ur ykk­ar og traustið sem þið hafið sýnt Flokki fólks­ins með því að gefa hon­um ykk­ar dýr­mæta at­kvæði. Það er mín bjarg­fasta trú að við séum að fara að eign­ast rétt­láta hrein­lynda rík­is­stjórn sem tek­ur utan um sam­fé­lagið okk­ar í heild sinni af um­hyggju og alúð.“