Stefán Steingrímur Bergsson, kennari í Laugalækjaskóla, biðlar til nýja meirihlutans í borgarstjórn Reykjavíkur um að breyta strax ákvörðun borgarinnar um að fresta framkvæmdum við skólann vegna myglu.

Í grein sem Stefán skrifar á Vísi lýsir hann þeim níu árum sem hann hefur starfað við unglingaskólann.

„Á þessum árum hef ég:

– Leitað til læknis vegna slappleika og slens og lítils þreks: mygla.

– Borðað hádegismat og kaffi baksviðs í gluggalausu rými: mygluviðgerðir.

– Horft upp á samstarfsfólk mitt verða fyrir heilsubresti: mygla.

– Horft upp á nemendur verða fyrir heilsubresti: mygla.

– Kennt í leigðum sal út í bæ: mygluviðgerðir.“

Myglan og loftleysið hafi einkennt öll níu árin sem hann hefur starfað við Laugalækjaskóla. „Myglan og loftleysið hefur einkennt skólastarfið öll mín kennsluár í Laugalækjarskóla. Ef ekki væri fyrir frábært samstarfsfólk, fróðleiksfúsa nemendur og skynsama foreldra væri ég kannski hættur. Skólinn er góður þó myglan sé slæm,“ skrifar Stefán.

Staðan í dag sé sú að stjórnendagangur skólans með sex skrifstofurýmum og einu fundarherbergi er grútmyglaður. Verktaki sé tilbúinn að ráðast í framkvæmdir strax í sumar. „EN!

„Nú er ekki lengur til peningur og framkvæmdum frestað“ kemur skyndilega frá borginni.

Þegar ég heyrði þetta fyrst fylltist ég mikilli reiði, allt að því bræði.

Þessi ákvörðun er ekki verjandi, henni verður að hnekkja. Ég, nemendur mínir og stjórnendur skólans verðum að geta unnið í ásættanlegu rými.“

Vísar hann svo í þegar Sigríður Heiða Bragadóttir hætti sem skólastjóri skólans árið 2023 eftir sautján ára starf. Skemmdir á skólanum komu í ljós 2016 og gengu framkvæmdir hægt, hún ætlaði að starfa lengur en gat það ekki vegna áhrifa myglu á heilsu hennar.

Stefán vill að eitthvað sé gert strax og vísar til slagorðs Sjálfstæðisflokksins í nýafstaðinni kosningabaráttu í Reykjavík: „Nú reynir á kjörna fulltrúa nýs meirihluta borgarstjórnar að standa undir loforðum um forgangsröðun verkefna borgarinnar. Til þeirra segi ég: breytið þessu, breytið þessu sem allra fyrst svo verktakinn geti byrjað strax um miðjan júní. Standið undir vígorði kosningabaráttunnar og hnekkið þessari ákvörðun STRAX!“