Ný ríkisstjórn Ungverjalands undir forystu Peter Magyar ætlar að leyfa gleðigönguna í Búdapest í ár. Gangan var bönnuð í stjórnartíð öfgahægrimannsins Viktor Orban.
„Lögreglan í Búdapest hefur samþykkt Búdapest Pride 2026 gönguna og hefur sett skorður á þrjá mótmælaviðburði gegn henni,“ segir í tilkynningu lögreglunnar.
Ungversk stjórnvöld bönnuðu gönguna í fyrra og hótuðu tugþúsundum þátttakenda sektum ef þeir sæjust í göngunni. Vel yrði fylgst með henni.
Segja má að þetta bann hafi sprungið í andlitið á Orban og öfgahægri stjórn hans. Um 200 þúsund manns mættu, langtum fleiri en nokkurn tíman áður. Fyrra met var um 35 þúsund manns.
Eins og flestir vita var stjórn Orban kolfelld í þingkosningum í vor og flokkur Magyar vann stórsigur og hreinan meirihluta. Magyar hefur heitið meira frjálslyndi í Ungverjalandi eftir mörg ár af afturhaldsstjórn Orban.
Evrópusambandið hefur þegar byrjað að losa fjármagn til Ungverjalands, sem hafði verið fryst út af spillingu og auknum ítökum ríkisstjórnarinnar í dómskerfinu.
„Þetta er rétta ákvörðunin,“ sagði Gergely Karacsony, borgarstjóri Búdapest, um ákvörðunina að leyfa gleðigönguna. „Þetta sýnir að þrátt fyrir kæfandi stjórnmálaástand undanfarinna fimmtán ára þá hefur frelsismenning Ungverjalands lifað af.“
