Ný borgarstjórn tók til starfa í dag. Hildur Björnsdóttir er formlega orðin borgarstjóri en Heiða Björg Hilmisdóttir afhenti henni lyklana klukkan hálf tvö. Á meðan var gert hlé á fyrsta borgarstjórnarfundi nýs meirihluta sem hófst klukkan tólf á hádegi.

Björg Magnúsdóttir, oddviti Viðreisnar, er forseti borgarstjórnar og Einar Þorsteinsson, oddviti Framsóknar, er formaður borgarráðs.

Á dagskrá fundarins eru 32 mál. Þar eru meðal annars kosningar í nefndir og ráð, endurskoðun samgöngusáttmálans, samstarf við atvinnulífið um leikskólarekstur og daggæslu, lengri opnunartími sundlauga, og breytingar á fánareglum við stjórnsýsluhús borgarinnar á dagskrá.

Í hádeginu opnaði svo vefsíðan verkefnalisti.is þar sem stefnumál meirihlutans eru útfærð og tímasett. Geta borgarbúar fylgst með framvindu verkefna sem sett eru fram í meirihlutasáttmála flokkanna.

Verkefnin skiptast í átta flokka: æskuárin (41), samgöngur (30), húsnæði (19), atvinnulíf og menning (20), hreyfing og útivist (23), efri árin (16), velferð (11), og rekstur og umhirða (30). Undirflokkar eru mismargir frá 11 í 41 verkefni, sjá má fjölda undirverkefna hvers flokks í sviga hér fyrir framan.

Meðal verkefna eru til dæmis að semja við einkaaðila um uppbyggingu hagkvæms húsnæðis fyrir leikskóla og dagheimili, endurskoðun á deiliskipulagi við Suðurlandsbraut, afnám reglna um hámarksfjölda bílastæða við nýbyggingar, lækkun fasteignaskatta á atvinnuhúsnæði, aukið aðgengi almennings að íþrótta- og skólahúsnæði borgarinnar, átak í tæknifærni eldra fólks, aukið öryggi íbúa með öflugra samstarfi við lögreglu, nýting gervigreindar og útvistun verkefna í auknum mæli við stafræna þróun borgarinnar, og þrýsting lagabreytingar svo fækka megi borgarfulltrúum úr 23 í 15.

Öll verkefni hafa tímaramma, ýmist 100 daga, 12 mánuði eða 4 ár.