Þjóðskjalasafn Íslands og netöryggisfyrirtækið Varist undirrituðu nýverið samning um innleiðingu á hugbúnaðarlausn Varist til að vernda mikilvæg gögn í langtímavörslu hjá stofnuninni. Lausnin, Varist Hybrid Detection Engine, er sérstaklega hönnuð til að skanna og greina gögn út frá þekktum og óþekktum ógnum, eins og segir í tilkynningu.

Þjóðskjalasafn Íslands geymir mikilvægar upplýsingar þar á meðal gögn sem oft eru eftirsótt í tölvuárásum. Má þar nefna ýmis gögn tengd íslenska ríkinu, manntalsgögn, persónuupplýsingar íslenskra ríkisborgara eins og fæðingar-, dánar- og hjónavígsluvottorð, sem og sögulegar heimildir og skjöl.

„Þjóðskjalasöfn um allan heim leggja aukna áherslu á að herða öryggi í sínum rekstri. Fjárfesting í lausninni frá Varist tryggir að við geymum þau gögn sem send eru til okkar í langtímavarðveislu á stafrænu formi án þess að þeim fylgi möguleg óværa.“ segir Kristján Þorvaldsson, fjármálastjóri Þjóðskjalasafns.

Aukin áhætta með gervigreindinni

„Gervigreind er þegar farin að framleiða ný spilliforrit sem eru hönnuð til að komast hjá hefðbundnum leiðum til að finna og greina þau. Gervigreindin hefur þannig fjölgað óþekktum ógnum. Nútímavæðing greiningargetu með Varist hugbúnaðinum auðveldar okkur að nema og greina ný spilliforrit sem gervigreindin getur búið til, í rauntíma og í stórum stíl. Hraðvirk og auðveld samþætting Varist lausnarinnar og greining hennar á spilliforritum gerir okkur kleift að takast á við krefjandi ógnir,“ segir Siggi Pétursson, vörustjóri Varist.

Kristján segir að hefðbundin greining netógna sé ekki lengur nægjanleg til að gæta öryggis. „Sú lausn sem við höfðum áður er ekki nægjanlegar til að tryggja öryggi. Þegar ógnirnar voru af mannavöldum höfðu tölvuþrjótar takmarkaða getu til að útfæra óværur,“ útskýrir Kristján. „Þegar við eigum í höggi við gervigreind sem getur búið til nýjar ógnir þarf að beita nýjustu aðferðum í vörnum. Í breyttum heimi leggjum við frekari áherslu á varnir á ýmsu sviði netöryggis og einn lykilþáttur í okkar öryggisnálgun er að tryggja heilleika þeirra gagna sem við varðveitum til langframa. Samstarfið við Varist hjálpar okkur að halda upplýsingum bæði stjórnvalda og almennra borgara lausum við háþróaðar ógnir sem geta falið sig fyrir hefðbundnum netvörnum og valdið miklu tjóni,“ segir Kristján.