Margrét Einarsdóttir prófessor og sérfræðingur í Evrópurétti segir þá umræðu sem eigi sér stað um auðlindir Íslands og Evrópusambandið óneitanlega sérstaka. Það eigi bæði við um það sem heyrist frá ráðherrum og stjórnarþingmönnum og þingmönnum stjórnarandstöðunnar. Bæði stjórn og stjórnarandstaða haldi því á lofti að samþykki þjóðin í þjóðaratkvæðagreiðslunni í sumarlok að taka upp á ný viðræður um aðild að Evrópusambandinu að þá verði í slíkum viðræðum að tryggja yfirráð Íslendinga yfir sínum náttúruauðlindum. Það sé hins vegar alveg ljóst að hvert og eitt aðildarríki sambandsins eigi sínar náttúruauðlindir þótt málið sé reyndar flóknara þegar kemur að fiskveiðiauðlindum.

Margrét ræðir þetta í viðtali við Meginlandið hlaðvarp Evrópuhreyfingarinnar:

„Mér hefur einmitt fundist aðeins sérstakt í umræðunni í rauninni bæði hjá stjórnvöldum og stjórnarandstæðingum að þeir hafa verið að tala um að við þyrftum að tryggja yfirráð yfir auðlindum okkar í aðildarviðræðum. En það er nú bara þannig að aðildarríki ESB þau eiga sjálf vatns-. og orkuauðlindir sínar.“

Hún segir að löggjöf ESB fjalli ekkert um eignarhald á slíkum auðlindum eða nýtingu auðlindanna. Þegar kemur að fiskveiðiauðlindum sé málið hins vegar flóknara.

Margrét segir að Evrópusambandið setji ýmis konar löggjöf varðandi undirbúning fyrir nýtingu vatns- og orkuauðlinda t.d. með lögum um mat á umhverfisáhrifum framkvæmda. Einnig hafi verið komið á lögum um innri markað með raforku, orkunýtni og orkuöryggi:

„En það að auðlindin færist á einhvern hátt í eigu ESB það er bara ekki rétt.“

Margrét ræðir þetta og fleira sem snertir hugsanlegt áframhald aðildarviðræðna Íslands við ESB við Helgu Völu Helgadóttur sem hefur umsjón með þættinum sem nálgast má í heild sinni hér fyrir neðan.

Fréttin hefur verið uppfærð