Héraðsdómur Norðurlands eystra hefur sakfellt Adolf Braga Hermannson fyrir að smána og ógna opinberlega Samtökunum 78, félagsmönnum í samtökunum og fólki sem styður samtökin.

Adolf var ákærður vegna ummæla sem hann birti á Facebook-síðu sinni 2. október 2023, en þau voru eftirfarandi:

1. „Þessi frásögn nægir til að fara í S78 samtökin og sprengja upp liðið og þau sem sleppa verða afhausuð eða hengd. FÓLK SEM ER Á VEGUM EÐA STYÐUR SAMTÖKIN 78 EÐA LGBQT ER HÉR MEÐ SJÁLFKRAFA DÆMD TIL DAUÐA. ÉG ER BÚINN AÐ SEGJA ÞAÐ VIÐ YKKUR Í S78 AÐ ÞIÐ VERÐIÐ DREPIN.“
2. „HENGJUM OG AFHAUSUM ALLA SEM STYÐJA SAMTÖKIN 78 OG LGBQT.“
3. „HÉR MEÐ LÝSI ÉG YFIR STRÍÐI VIÐ SAMTÖKIN 78 OG LGBQT HVER OG EITT EINASTA SKÍTADRASL INNANUM S78 VERÐA DREGIN ÚT Á HÁRINU OG HENGD.“
4. „Þið öll sem eruð á vegum S78 og LGBQT er hér með dæmd til dauða.“

Brot Adolfs var talið varða við 1. mgr. 233 gr. almennra hegningarlaga með síðari breytingum, en sá lagatexti er eftirfarandi:

„Hver, sem hefur í frammi hótun um að fremja refsiverðan verknað, og hótunin er til þess fallin að vekja hjá öðrum manni ótta um líf, heilbrigði eða velferð sína eða annarra, þá varðar það sektum eða fangelsi allt að 2 árum.“

„Hver sem opinberlega hæðist að, rógber, smánar eða ógnar manni eða hópi manna með ummælum eða annars konar tjáningu, svo sem með myndum eða táknum, vegna [þjóðernisuppruna eða þjóðlegs uppruna],  litarháttar, kynþáttar, trúarbragða, [fötlunar, kyneinkenna], kynhneigðar eða kynvitundar, eða breiðir slíkt út, skal sæta sektum eða fangelsi allt að 2 árum.“

Játaði sök

Adolf játaði sök fyrir dómi en krafðist vægustu refsingar sem lög leyfa. Í dómnum segir að Adolf hafi viðhaft orðræðu sem felur í sér fordómafulla og hatursfulla tjáningu sem er í senn ógnandi og hvetur til ofbeldis í garð hópa vegna kyneinkenna, kynhneigðar eða kynvitundar þeirra. Sé því nauðsynlegt í þessu tilviki að takmarka stjórnarskrárvarið tjáningarfrelsi hans í samræmi við ákvæði stjórnarskrárinnar þar um, og sakfella hann fyrir þessa háttsemi.

Var hann dæmdur í tveggja mánaða skilorðsbundi fangelsi.

Dóminn má lesa hér.