Þórður Snær Júlíusson hættir sem ritstjóri Heimildarinnar. Þetta tilkynnir hann á samfélagsmiðlum síðdegis í dag.

„Það eru komin rúmlega ellefu ár síðan að ég tók þátt í að stofna Kjarnann með ótrúlegum hópi fólks og ég hef í nokkurn tíma verið einn eftir úr honum. Kjarninn sameinaðist svo Stundinni og varð að Heimildinni í lok árs 2022. Allan þennan tíma hef ég sinnt starfi ritstjóra. Og raunar flestum öðrum störfum sem þurft hefur að ganga í líka,“ segir Þórður í færslunni. „Þetta er starf sem gefur mikið, en tekur auðvitað mikið líka.“

Þórður segir að nú sé kominn tími til að skipta um takt. Enginn sé ómissandi og maður komi í manns stað. Heimildin sé á góðu róli og hafi farið í gegnum tímabili breytinga.

„Fyrir nokkru tilkynnti ég stjórn Sameinaða útgáfufélagsins að ég hefði hug á að láta af störfum sem ritstjóri Heimildarinnar og sú niðurstaða formgerðist í dag. Nú tekur við yfirlega um hvað ég ætla að verða þegar ég verð stór,“ segir Þórður. „Það er auðvitað skrýtið að kveðja eitthvað sem maður hefur tekið svona mikinn þátt í að skapa og lagt svona mikið í. Og það örlar eðlilega á blendnum tilfinningum. Ég er hins vegar sannfærður um að þetta sé rétt skref á þessum tímapunkti og finn fyrst og síðast fyrir ofsalegu þakklæti og stolti yfir að hafa fengið tækifæri til að fara í þessa brjáluðu vegferð sem stofnun á litlum og gagnrýnum aðhaldsfjölmiðli, í afar skökku samkeppnisumhverfi innan örsamfélags, er.“

Þakkar hann samferðafólki sínu, samstarfsmönnum, hluthöfum og öðrum sem tekið hafa þátt í starfinu með honum.