Óhætt er að segja að færsla Ingu hafi vakið athygli og voru ófáir sem tóku undir málstað hennar í athugasemdum við færsluna.
Færsla Ingu var svona:
„Ég vil stöðva allt flæði hælisleitenda til landsins og það fyrir löngu síðan. Ísland er uppselt fyrir hælisleitendum það er ekki flóknara. Við erum enn að vinna úr á fimmta þúsund hælisumsóknum þar sem kostnaðurinn er gjörsamlega stjórnlaus. Beinn kostnaður nú þegar ríflega 20.000.000.000 milljónir króna. (21 milljarður) Óbeini kostnaðurinn ekki kominn upp á yfirborðið en hann skiptir milljörðum til viðbótar. Einnig þurfum við að finna framtíð fyrir heilt sveitarfélag sem var rýmt vegna náttúruhamfara. þar vantar öryggi fyrir 1200 Grindvískar fjölskyldur.“
Sem fyrr segir voru margir sem hrósuðu Ingu fyrir að þora að stíga fram með þessa skoðun sína. „Loksins kominn fram stjórnmálamaður sem þorir að segja hlutina eins og þeir eru,“ sagði til dæmis í einni athugasemd.
Egill Helgason fjölmiðlamaður gagnrýndi hins vegar skrif Ingu og sagði einfaldlega:
„Nöturleg skrif og laus við mannúð.“
Inga var ekki á þeim buxunum að láta Egil vaða yfir sig.
„Það eina nöturlega hér eru persónuárásir þínar og ímynduð hjartagæska. Komdu einhvern tímann með eitthvað af viti í stað upphrópana um innantómt blaður á annarra mannvonsku. Ef þú heldur að skoðana- og tjáningarfrelsi eigi ekki við um mig sem þig og “góða fólkið” í Samfylkingunni þinni þá er það mesti misskilningur.“
