„Dóttir mín var einmitt að spyrja mig um þetta, hvort ég hefði orðið vör við eitthvað, ég varð ekki vör við neitt. En ég gekk fram hjá hurðinni, þetta er á jarðhæð, Spítalastígsmegin, ég sá þá að lögregla hafði innsiglað, þannig að það leyndi sér ekki að þetta var staðurinn,“ segir kona sem býr í húsi á horni Grundarstígs og Spítalastígs, og heyrði fyrst um harmleikinn sem varð í húsinu í morgun í gegnum dóttur sína, sem hafði lesið fréttir um málið.
DV tók meðfylgjandi mynd af útidyrahurðinni og þar sést innsigli lögreglunnar greinilega.
Eins og komið hefur fram í fréttum í dag eru tveir í haldi lögreglu vegna mannsláts sem varð í einni íbúðinni húsinu í morgun. Er lögregla kom á staðinn voru þrír í íbúðinni, einn þeirra meðvitundarlaus. Endurlífgunartilraunir báru ekki árangur og var maðurinn úrskurðaður látinn við komuna á sjúkrahús. RÚV greindi frá og einnig frá því að lögregla hefði komið vegna kvörtunar nágranna um hávaða og háreysti. Hafi nágrannar vaknað við öskur og dynki og haft samband við lögreglu.
Samkvæmt nýjustu upplýsingum frá lögreglu eru taldar minni líkur en meiri á því að andlátið hafi borið að með saknænum hætti.
Samtals eru fimm íbúðir í húsinu, þar af tvær á jarðhæð, hvor með sínum inngangi. Fyrir ofan eru tvær hæðir og loks rishæð. Íbúi á rishæðinni sem DV ræddi einnig stuttlega við varð hvorki var við háreysti í morgun né nokkurn tíma fyrr og hefur aldrei haft neitt af íbúðum jarðhæðarinnar að segja.
Konan sem DV ræddi við býr á þriðju hæð, þ.e. ein hæð er á milli hennar og jarðhæðarinnar. Það litla sem sem hún hefur af íbúum jarðhæðarinnar að segja er gott eitt:
„Ég varð ekki vör við neitt og það býr þarna eitthvert ungt fólk, held ég, sem ég þekki hreinlega ekki neitt. Hef bara heilsað þeim. Þetta er alveg hræðilegt. Ég gekk þarna framhjá í gærkvöld og þá stóð þarna ung kona við dyrnar, Spítalastígsmegin, ég bauð bara gott kvöld og hún mér og ekkert meira um það. Ég hef alls ekki neitt orðið vör við ónæði. Það er reyndar ein hæð á milli mín og jarðhæðarinnar, en ég hef aldrei haft nokkurn hlut af þessu fólki að segja,“ segir konan og lýsir yfir mikilli hryggð yfir atburðinum. Hún telur þó illskárra ef það reynist rétt að andlát mannsins hafi ekki borið að með saknæmum hætti. „Það er skárra ef það er þannig,“ segir hún.
