Íslenska skáklandsliðið vann rétt í þessu frækilegan sigur á norska landsliðinu með sjálfan Magnus Carlsen, sterkasta skákmann heims, í broddi fylkingar. Lokatölur urðu 2,5 – 1,5 sigur Íslands þar sem þeir Hannes Hlífar Stefánsson og Hilmir Freyr Heimisson unnu sínar skákir.
Stórmeistarinn Hjörvar Steinn Grétarsson fékk það óárennilega verkefni að glíma við Magnus á fyrsta borði og það með svörtu mönnunum. Hjörvar og Magnus eru góðir félagar en vinarþelið vék fyrir blóðugri baráttu. Hjörvar barðist hetjulega en mátti að lokum ekki við ofureflinu og þurfti að játa sig sigraðan eftir 47. leiki.
Á þriðja borði hélt Vignir Vatnar örugglega jafntefli með svörtu mönnunum gegn stórmeistaranum Lars Oskar Hauge. Eftir stóðu Hannes Hlífar og Hilmir Freyr með hvítu mennina gegn alþjóðlegu meisturunum Elham Amar og Tor Frederik Kaasen en lengi vel leit ekki út fyrir að þeir myndu í mesta lagi ná að tryggja Íslandi skiptan hlut. Um var að ræða langar baráttuskákir en að endingu náðu þeir félagarnir að snúa á andstæðinga sína og tryggja óvæntan en glæsilegan sigur.
Íslenska liðið hefur nú unnið tvær viðureignir, gegn Kósovó og Noregi eftir slæma útreið gegn Serbíu í fyrstu umferð þar sem ekkert gekk upp. Búast má við afar sterkum andstæðingum í 4. umferð sem fer fram á morgun.
Íslenska kvennalandsliðið hefur byrjað erfiðlega í mótinu og tapaði í þriðju umferð með minnsta mun fyrir tékkneska landsliðinu, 2,5 – 1,5. Jóhanna Björg Jóhannsdóttir vann góðan sigur á þriðja borði en þá þegar voru úrslitin orðin ljós því Tékkar höfðu önglað saman 2,5 vinningum. Olga Prudnykova gerði jafntefli á fyrsta borði en Lenka Ptacnikova og Lisseth Acevedo Mendez þurftu að sætta sig við ósigur.
Íslensku landsliðskonurnar hafa verið ófarsælar og taflmennskan betri en úrslitin gefa til kynna. Enn er þó nóg eftir af mótinu til að uppskera eins og sáð var.
Rétt er að benda áhugasömum á frábæra pistla Ingvar Þórs Jóhannessonar, liðstjóra kvennalandsliðið, sem birtast á skak.is. Það er ljóst að það verður gaman á lyklaborðinu hjá Ingvari í kvöld.+
