Guðbrandur Einarsson, þingmaður Viðreisnar, tók mál Guðmundar Sölva Ármannssonar, fyrir í umræðu á Alþingi á miðvikudag, 1. febrúar. Guðmundur Sölvi sem er á 14. ári fæddist með tvíklofna vör og góm sem sérfræðingar telja sérstaklega erfitt tilfelli.
Ragnheiður Sölvadóttir, móðir Guðmundar Sölva, var í ítarlegu viðtali hjá DV síðastliðinn mánudag, 30. janúar. Þar lýsti hún baráttu sinni og samskiptum við kerfið allt frá fæðingu sonarins, fyrst við Fæðingarorlofssjóð, síðan Tryggingastofnun og Sjúkratryggingar Íslands.
„Það er ekkert smáræði sem lagt er á þennan dreng og móður hans. Hann er búinn að vera reglulegur gestur hjá læknum frá því að hann var fimm ára gamall og þetta hamlar honum í daglegu lífi. Hann getur ekki stundað fótbolta eins og hann langar til þar sem hann má ekki fá högg í andlitið,“ segir Guðbrandur.
Í síðustu viku barst Guðmundi Sölva bréf frá Sjúkratryggingum Íslands þess efnis að stofnunin taki ekki þátt í frekari niðurgreiðslu vegna tannréttinga nema hann fari í enn eitt endurmatið hjá tannlæknadeild Háskóla Íslands. Mál þeirra er því í biðstöðu á meðan. Eins og kom fram í viðtali DV við Ragnheiði þá varð reglugerðarbreyting árið 2019 þar sem Guðmundi Sölva er gert að gangast undir mat hjá tannlæknadeild Háskólans. „En þar er hann einhverra hluta vegna boðaður ítrekað í viðtal, að öðrum kosti falli niðurgreiðsla niður. Þetta setur alla á bið sem að málinu koma, tannréttingasérfræðinginn, kjálkaskurðlækninn og lýtalækninn, vegna óvissunnar sem verið er að skapa,“ segir Guðbrandur. „Mál þeirra er því í biðstöðu á meðan.“
Guðbrandur beinir orðum sínum til heilbrigðisráðherra, Willum Þórs Þórssonar: „Hversu galið er það að setja barn í þessa óvissu í miðri meðferð? Er það virkilega skoðun hæstv. heilbrigðisráðherra að fæðingargalli sem þessi lagist bara af sjálfu sér og því þurfi að setja hann endurtekið í endurmat á meðan meðferð stendur yfir? Það væri nógu sorglegt ef þetta væri einsdæmi en svo er ekki. Þessu þarf að breyta.“
