Sverrir Einar Eiríksson, eigandi og rekstraraðili Nýju vínbúðarinnar, hefur verið ákærður fyrir skattsvik og peningaþvætti. Vísir greindi frá.
Sverrir Einar er ákærður af héraðsaksóknara fyrir aðkomu sína að rekstri þriggja einkahlutafélaga sem öll hafa orðið gjaldþrota og hafa verið afskráð. Í frétt Vísis, sem hefur ákæruna undir höndum, kemur fram að málið gegn athafnamanninum verði þingfest í mars.
Um er að ræða einkahlutafélögin BHG ehf, Sogið veitingar ehf. og Jupiter gisting ehf. Sverrir Einar er ákærður fyrir meiriháttar brot á skattalögum og peningaþvætti í rekstri félaganna sem framkvæmdastjóri þeirra og stjórnarmaður. Sogið veitingar ehf. var félag utan um rekstur Þrastalundar en Jupiter gisting var um tíma rekstrarfélag Hótel Brims í Skipholti.
Nánar er fjallað um málið á Vísi
DV hefur ítrekað fjallað um ævintýri Sverris Einars í viðskiptalífinu undanfarin ár. Hann hefur rekið starfsmannaleigu, keypt og selt Íslendingum gull, rekið pizzustað í miðbænum, selt Herbalife, stofnað smálánafyrirtæki og boðið landanum upp á 95% fasteignalán svo eitthvað sé nefnt. Þá var hann fljótur til að grípa hið nýja tækifæri sem virðist felast í að stofna erlenda vefverslun og selja Íslendingum áfengi í gegnum netið.
Sjá einnig: Sverir opnar Nýju vínbúðina
Faðir Sverris Einars er sjónvarpspredikarinn Eiríkur Sigurbjörnsson, gjarnan kenndur við Omega. Eiríkur var í október á síðasta ári dæmdur í 10 mánaða skilorðsbundið fangelsi til tveggja ára fyrir skattsvik auk þess sem honum var gert að endurgreiða ríkissjóði um 109 milljónir króna.
Eríkur var dæmdur fyrir að skila efnislega röngum skattframtölum á árunum 2011-2016. Þá var hann sagður hafa látið undir höfuð leggjast að telja fram ríkulegar úttektir úr fyrirtæki í rekstri sem hann nýtti sér persónulega.
Sjá einnig: Trúboðinn Eiríkur í Omega fékk 10 mánuði skilorðsbundna og 109 milljón króna sekt
