Barn á leikskólanum Hálsaskógi í Breiðholti greindist í dag með virkt Covid-19 smit. Leikskólanum hefur verið lokað í dag og börnin send heim.
Þetta staðfestir Ásgerður Guðnadóttir leikskólastjóri við blaðamann DV.
Að sögn Ásgerðar er um að ræða 75 börn á leikskólanum og hafa þau öll verið sótt af foreldrum sínum. Leikskólinn er í tveimur húsum og hefur öðru þeirri verið lokað, segir Ásgerður.
Samkvæmt heimildum DV er jafnframt grunur um að starfsmaður sé smitaður. Starfsmenn á deild barnsins hafa verið sendir í tveggja vikna sóttkví og hafa aðrir starfsmenn verið sendir í tveggja vikna varúðarsóttkví þar til niðurstöður prófa liggja fyrir.
Ekki er vitað hvort allir starfsmenn verða sendir í tveggja vikna sóttkví, en foreldrum var sendur eftirfarandi póstur:
Kæru foreldrar,
Eins og mörg ykkar vita nú þegar þá var barn að greinast með covid í Koti Hálsaskógi og eins er grunur um smit hjá starfsmanni. Við þurfum því að loka deild barnsins (Birkilundi) og börn og starfsmenn þeirrar deildar að fara í sóttkví í tvær vikur. Hinar tvær deildirnar verða einnig lokaðar þangað til starfsmaðurinn fær niðurstöður úr sinni skimun.
Ég mun halda ykkur upplýstum og bið ykkur því að fylgjast vel með tölvupósti.
Kær kveðja,
Ásgerður
Hlutfallslega fá smit af COVID-19 hafa greinst hjá börnum á leik- og grunnskólaaldri, flest börn fá væg einkenni og einnig benda upplýsingar til að börn smiti sjaldan aðra.
Uppfært kl. 13.11: Ljóst er að aðeins sú deild leikskólans þar sem smitið kom upp mun fara í sóttkví í 14 daga. Leikskólinn verður opinn að öðru leyti. Helgi Grímsson, sviðsstjóri skóla- og frístundasviðs Reykjavíkurborgar staðfestir þetta í samtali við mbl.is.
