Miðaldra erlendur karlmaður reyndi að smygla einu kílói af hassi til landsins fyrr í þessum mánuði. Maðurinn var að koma frá Madrid á Spáni. Var hann með um hundrað pakkningar innvortis og innan klæða. Orðrétt tilkynning lögreglunnar á Suðurnesjum um málið er eftirfarandi:
„Lögreglan á Suðurnesjum handtók fyrr í mánuðinum erlendan karlmann á sextugsaldri sem hafði reynt að smygla um einu kílói af hassi til landsins. Maðurinn var að koma með flugi frá Madrid og stöðvaði tollgæslan hann í Flugstöð Leifs Eiríkssonar. Hann gekkst þá strax við broti sínu, en hassið var í um það bil hundrað pakkningum sem hann hafði komið fyrir innvortis og svo innan klæða.Maðurinn var vistaður í fangaklefa á lögreglustöð þar sem hann skilaði af sér pakkningunum sem hann hafði innvortis. Hann var úrskurðaður í gæsluvarðhald og síðan til að sæta tilkynningaskyldu til 22. nóvember.“
