Félag íslenskra bifreiðareigenda (FÍB) kannaði verð á umfelgun hjá 40 dekkjaverkstæðum vítt og breitt um landið. 90 prósent munur var á hæsta og lægsta verði. Hjá flestum fyrirtækjum er verið að bjóða sama verð fyrir þjónustuna núna og í vorkönnun FÍB 2017. Átta fyrirtæki lækka verðið frá því í vor og átta hækka. Könnunin var framkvæmd miðvikudaginn 11. október.

Spurt var: „Hvað kostar umfelgun og jafnvægisstilling á fjórum 16 tommu álfelgum.“

Beðið var um listaverð án allra afslátta eða sérkjara. Miðað var við dekkjaskipti á Toyota Corolla með hjólastærð 205/55 R16, sem er ein algengasta hjóla- og dekkjastærð fólksbíla á íslenska markaðnum.

Lægsta verðið var að finna hjá Títancar í Kópavogi eða fimm þúsund krónur. Hæsta verðið var að finna hjá N1 um allt land eða 9493 krónur. Munur á hæsta og lægsta verði er því um 90 prósent.

Hægt er að sjá verðin í töflunni hér að neðan frá FÍB.

Könnunin fór fram í gegnum síma og eingöngu var kannað verð á umfelgun og jafnvægisstillingu á fjórum 16 tommu álfelgum. Ekki var lagt mat á gæði þjónustunnar eða mögulegan mun á þjónustunni.

Hinn formlegi vetrardekkjatími gengur í garð þann 1. nóvember. Þá verður löglegt að aka á negldum dekkjum. Það má reikna með að það verður mikið að gera á hjólbarðaverkstæðum eftir mánaðarmót og þegar fyrsti snjórinn fellur.