Áslaug Arna Sigurbjörnsdóttir, þingmaður Sjálfstæðisflokksins, var skipuð dómsmálaráðherra í dag, en um það var tilkynnt síðdegis í gær. Hefur Áslaug hlotið fjölda hamingjuóska á samfélagsmiðlum, en athygli vekur að þegar þetta er skrifað, hafa aðeins tveir þingmenn Sjálfstæðisflokksins óskað Áslaugu til hamingju á Facebook, samkvæmt yfirferð Eyjunnar.
Það eru þær Þórdís Kolbrún Gylfadóttir og Bryndís Haraldsdóttir sem samgleðjast Áslaugu Örnu, en þar við situr úr þingflokknum.
Enn meiri athygli vekur að þingmenn Samfylkingarinnar virðast keppast um að óska Áslaugu til hamingju á Facebook, það gera þau Logi Einarsson, formaður, Oddný G. Harðardóttir, varaformaður, Helga Vala Helgadóttir og Guðmundur Andri Thorsson.
Þingflokkur Sjálfstæðisflokksins telur 16 þingmenn, en Samfylkingar sjö.
Hamingjuóskir Samfylkingafólks á samfélagsmiðlum eru svo margar og áberandi, að mörgum kratanum þykir orðið nóg um, ef marka má athugasemdakerfi Facebook, hvar þessu er fundið til foráttu.
Ljóst er að færslur á samfélagsmiðlum endurspegla ekki endilega raunveruleikann í þessum efnum, en niðurstaðan er samt athyglisverð, ekki síst þegar haft er til hliðsjónar að tillaga Bjarna um Áslaugu var samþykkt einróma innan þingflokksins sjálfs, þó svo ljóst sé að einhverjir töldu fram hjá sér gengið, líkt og Páll Magnússon viðurkenndi við Eyjuna fyrr í dag.
