Búið er að krefjast gæsluvarðhalds yfir einum sakborningi í manndrápsmáli sem varðar lát manns á sjötugsaldri frá Þórshöfn. Var sá sakborningur sem fyrst var handtekinn leiddur fyrir dómara við Héraðsdóm Suðurlands á Selfossi og krafist gæsluvarðhalds yfir honum til 19. mars. Aðrir sakborningar verða leiddir fyrir dómara síðar í dag en ekki liggur fyrir hvað krafist verður gæsluvarðhalds yfir mörgum sakborningum. Samkvæmt frétt RÚV eru fimm enn í haldi lögreglu vegna málsins en átta voru handtekin í gær.
Samkvæmt heimildum DV reyndu árásarmennirnir árangurslaust að kúga út úr brotaþolanum fé og vildu að hann millifærði þrjár milljónir króna. Maðurinn neitaði því. Hann bar mikla áverka eftir barsmíðar og spörk, hafði meðal annars verið traðkað á honum.
Meðal handtekinna og grunaðra í málinu er þekktur afbrotamaður á fertugsaldri.
Samkvæmt staðfestum heimildum DV tengist árásin tálbeituhópum og þeim athöfnum þeirra að lokka eldri menn á stefnumót sem þeir halda að sé við stúlkur undir lögaldri. DV hefur samt ekki nánari upplýsingar um tildrög árásarinnar hvað þessi tengsl varðar.
Búast má við frekari tíðindum af gæsluvarðhaldi í þessu máli síðar í dag og á morgun.
Héraðsdómur samþykkti beiðni Lögreglustjórans á Suðurlandi um gæsluvarðhald yfir þessum sakborningi til 19. mars. Sakborningur mun áfrýja úrskurðinum til Landsréttar.
Krafist verður gæsluvarðhalds yfir fleiri sakborningum í málinu á morgun en DV hefur ekki upplýsingar um hve mörgum sakborningum lögregla vill halda í gæsluvarðhaldi.
