Flestar íbúðir sem hafa verið seldar á árinu hafa verið keyptar af fjárfestum. Þessu greinir Sigurður Stefánsson, framkvæmdastjóri Aflvaka Þróunarfélags, í grein sem britist hjá Innherja. Hann segir að af þeim íbúðum sem bættust við markaðinn á fyrstu sex mánuðum þessa árs hafi tæplega 90% verið keyptar af fjárfestum af ýmsum toga.

Sigurður bendir á að raunverð fasteigna á Íslandi hefur hækkað töluvert meira en í öðrum OECD-ríkum og um fimm sinnum meira en hjá Norðmönnum og Dönum.

„Þeir sem kaupa fasteignir eru ekki fjölskyldur sem kaupa íbúðir til að eignast þak yfir höfuðið heldur einstaklingar sem kaupa íbúðir til viðbótar við eigið íbúðarhúsnæði og fjárfestingafélög til útleigu. Frá árinu 2021 hefur orðið gífurleg breyting að þessu leyti þar sem hlutfall þeirra sem kaupa íbúð á landinu öllu til eigin nota hefur farið úr 74% og niður í 13%. Nú er svo komið að 87% þeirra sem hafa keypt fasteignir á þessu ári eru fjárfestar sem hafa ekki áform um að búa sjálfir í húsnæðinu.“

Með þessari þróun, segir Sigurður, hefur almenningur í landinu verið dæmdur úr leik. Þeir einir geta keypt sem þegar eiga fjármuni og eignir. Um sé að ræða mein sem megi rekja til íbúðaskorts. Ef ekki verður gripið inn í þessa þróun þá verði gífurlegar breytingar á samfélaginu. Almenningur hættir að geta keypt sér húsnæði til eigin nota heldur neyðist til að leita á leigumarkað og borgar þannig eignamyndun fyrir fjárfesta.

Þessi grein Sigurðar hefur vakið hörð viðbrögð en Íslendingar skrifa í athugasemdum á Facebook að nú þurfi að grípa til aðgerða og jafnvel lagabreytinga. Til dæmis mætti auka skattlagningu á eignir sem ekki eru til eigin nota.

Einn skrifar í umræðu um greinina í Facebook-hóp Sósíalistaflokksins: „Það er kolvitlaust gefið. Hér ráða peningarnir öllu. Skömm að þessu.“

Aðrir benda á þá sorglegu þróun að það séu nú gífurleg forréttindi að eiga þak yfir höfuðið. Að eiga fasteign sé orðið að lúxus sem unga fólkið hefur ekki ráð á. Aðgerðarleysi stjórnvalda ali á stéttaskiptingu.

Ein deilir greininni og segir bara : „Þetta er ógeðslegt þjóðfélag, þetta er allt ógeðslegt.“