Reynir Bergmann og Sólveig Ýr Sigurjónsdóttir Saithong hafa selt veitingastaðinn Vefjuna, Gnoðarvogi í Reykjavík. Síðasti dagur þeirra í rekstri er á morgun og nýir eigendur taka við staðnum miðvikudaginn 1. febrúar.

„Síðustu vikur hafa verið langar og strangar við settum gullmolann og barnið okkar á sölu og höfum formlega gengið frá sölu á Vefjunni í hendur algjörra fagmanna. Síðasti dagur okkar er á morgun og getum við lofað öllum okkar stóra viðskiptavinahóp að Vefjan verður alveg eins ef ekki betri í höndum nýrra eiganda frá og með 1. febrúar,“ segir Reynir á Facebook.

Í samtali við DV segir Reynir að nýir eigendur séu Egill Darri Makan Þorvaldsson, fótboltamaður, og Daníel Örn Einarsson, fyrrum eigandi Spot í Kópavogi. „Við seldum í raun bara því við vorum farin að finna fyrir leiða og metnaðurinn og ástríðan farinn að minnka. Einnig vegna annarra verkefna sem við erum að vinna í þá töldum við best að koma gullinu hennar Sólveigar í hendur aðila sem vilja taka þetta enn lengra og geta sinnt Vefjunni af ástríðu,“ segir Reynir.

„Blendnar tilfinningar í gangi,“ skrifa þau og segja að nýir eigendur muni halda áfram með þeirra frábæru uppskriftir og jafnvel bæta einhverju nýju og skemmtilegu inn í. Þakka þau fyrir móttökurnar og viðskiptin síðastliðin ár.

Parið opnaði Vefjuna í Gnoðarvogi 10. desember 2020, en í apríl sama ár byrjuðu þau með rekstur matarvagns með sama nafni á Selfossi.