Klukkan að ganga tvö í dag stöðvaðist skíðalyfta í Hlíðarfjalli við Akureyri og festust 20 manns í lyftunni. Björgunarsveit, sjúkralið og lögregla komu á vettvang og hjálpuðu fólki úr lyftunni. Engan sakaði.

Tilkynning Lögreglunnar á Norðurlandi eystra um málið er eftirfarandi:

„Kl. 13:38 barst tilkynning um að skíðalyfta í Hlíðarfjalli, Fjarkinn, hafi stöðvast og að um 20 manns væri í lyftunni. Óskað var eftir aðstoð björgunarsveitarinnar Súlur við að koma fólkinu úr lyftunni.

Aðgerðarstjórn var virkjuð. Lögregla, sjúkralið og björgunarsveit var boðuð á vettvang og strax hafist handa við að koma fólkinu úr lyftunni. Fljótlega kom í ljós að bilunin í lyftunni stafaði af því að vír hafði losnað úr spori sínu og lyftan stöðvast við það. Ekki er vitað til þess að neinn hafi slasast og ekki talin hætta á að það muni gerast. Þegar þetta er skráð er búið að ná nokkrum niður úr lyftunni og vinna í gangi við að ná þeim sem eftir eru. Þeir fá svo skoðun hjá heilbrigðisstarfsfólki.“