Konan hafði nýlokið vinnu á dvalarheimili aldraðra í Holbæk og var nýsest í bílinn sinn þegar maður réðst á hana með hníf að vopni. Hann dró hana út úr bílnum og stakk margoft. Vitni reyndi að koma konunni til bjargar en tókst ekki.
Lögreglan kom fljótt á vettvang en þá var árásarmaðurinn á bak og burt. Konan var strax flutt á sjúkrahús en var úrskurðuð látin við komuna þangað. Hún var barnshafandi og tókst læknum að bjarga barninu úr kviði hennar. Barnið, sem var drengur, lést hins vegar á þriðja tímanum í gær.
Hin látna var afganskur ríkisborgari, búsett í Danmörku. Það sama á við um hin handteknu. Lögreglan segir að þau „tengist“ bæði hinni látnu en hefur ekki viljað skýra þau tengsl frekar. Danskir fjölmiðlar skýrðu frá því í gær að maðurinn hefði komið til Danmerkur í september. Hann er að sögn ólæs og átti erfitt með að skilja það sem fram fór í dómsal í gær en túlkur var fólkinu til aðstoðar þar.
Þegar gæsluvarðhaldskrafan var tekin fyrir kom fram að lögreglan telur að konan hafi skipulagt eða hvatt til morðsins en maðurinn séð um framkvæmdina. Saksóknari sagði að þau hafi rætt um morðið og skipulagt það í samskiptum á WhatsApp.
Einnig kom fram að konan var stungin margoft, í háls, líkama og fætur. Auk þess var hún skorin á háls.
Hin handteknu neituðu sök.
