Íslenska Óperan var á dögunum dæmd í Landsrétti til að greiða óperusöngkonunni Þóru Einarsdóttur 638.168 krónur vegna eftirstöðva æfingalauna, launatengdra gjalda og yfirvinnu. Þetta kemur fram í dómnum sem birtur var á vefsíðu Landsréttar en Þóra vakti athygli á niðurstöðunni í tilkynningu sem hún sendi á fjölmiðla í dag.
Við æfingar á uppsetningu á Brúðkaupi Fígarós árið 2019 tók Íslenska Óperan að boða einsöngvara sýningarinnar á æfingar sem voru umfram vinnuverndarákvæði í kjarasamningi stéttarfélags þeirra við Íslensku Óperuna. „Æfingaálag varð það mikið að söngvarar höfðu áhyggjur af raddheilsu sinni og heilsu almennt. Áhyggjum af þessu var ítrekað lýst við óperustjóra,“ segir Þóra í tilkynningunni.
„Þrátt fyrir það var ekki dregið úr æfingaboðum og álagi. Söngvararnir leituðu til stéttarfélags síns um útreikning á greiðslum fyrir yfirvinnutímana. Óperustjóri hafnaði því hins vegar að greiða fyrir yfirvinnu og fullyrti að samningur stéttarfélags FÍH við óperuna hefði ekkert gildi.“
Þóra Einarsdóttir höfðaði þá mál fyrir Héraðsdómi þar sem hún stefndi Íslensku Óperunni fyrir brot á kjarasamningi. Hún byggði á því að hún hefði fengið of lágar greiðslur á æfingatímabili, Íslensku Óperunni bæri að greiða yfirvinnu og launatengd gjöld eins og tilgreint er í kjarasamningnum.
Héraðsdómur dæmdi Íslensku Óperunni í hag því hann taldi að um frjálsan verksamning væri að ræða og að aðilum hefði verið frjálst að semja undir lágmarksviðmiðum kjarasamningsins. Í kjölfarið gaf Íslenska Óperan út fréttatilkynningu þar sem því var lýst yfir að löglegt hafi verið að greiða söngvurum lægri greiðslur en samkvæmt kjarasamningi.
Sjá einnig: Hneig niður á æfingu og stefnir Óperunni fyrir samningsbrot
„Dómur Héraðsdóms setti alla samninga um verkefnaráðningar sviðslistafólks í uppnám og skapaði mikla óvissu meðal söngvara um hver réttarstaða þeirra væri gagnvart Íslensku Óperunni,“ segir í tilkynningu Þóru en eftir að niðurstaða Héraðsdóms var ljós áfrýjaði Þóra dómnum til Landsréttar.
Sérstakt leyfi þurfti til vegna þess að fjárhæðin sem deilt var um í málinu var undir lágmarks áfrýjunarfjárhæð, þótt ljóst væri að málið hefði fordæmisgildi fyrir fjölmarga aðra.
Eins og fyrr segir liggur niðurstaða Landsréttar nú fyrir í málinu Landsréttur staðfesti að Íslenska Óperan hafi ekki farið að lögum við samningsgerð við söngvara. Féllst Landsréttur á rök og kröfur Þóru í málinu að öllu leyti. Þóra segir að um áfellisdóm yfir Íslensku Óperunni sé að ræða.
„Eins og sjá má á niðurstöðu þessa máls snýst það um mun meiri hagsmuni en aðeins þá dómkröfu sem tekist var á um í þessu máli. Málið er mikilvægt réttindamál fyrir söngvara og niðurstaðan sýnir að söngvarar líkt og aðrar starfsstéttir eiga rétt á að njóta lágmarkskjara,“ segir Þóra að lokum í tilkynningunni.
