Rafmyntir eru frekar nýlegt fyrirbæri en þær hafa vakið mikla athygli á síðustu árum og þá sérstaklega Bitcoin. Bitcoin var búin til sem svar við viðbrögðum seðlabanka heimsins við fjármálakreppunni en enginn veit hver bjó myntina til.

Segja má að Bitcoin hafi verið verk aðgerðarsinna, eins eða fleiri, sem átti að vera nýtt kerfi og gjaldmiðill sem var utan seilingarfjarlægðar yfirvalda. Margir töldu að yfirvöld væru oft að vinna gegn hagsmunum borgaranna og vildu því gjarnan koma upp kerfi sem hið opinbera eða bankarnir gætu ekki náð til, gjaldmiðli utan seilingar yfirvalda.

Bitcoin var fyrsta rafmyntin sem náði vinsældum en hún kom á markaðinn í janúar 2009 sem svar við því sem talin voru slæleg viðbrögð seðlabanka við fjármálakreppunni.

Ekki er vitað hver bjó Bitcoin til. Aðeins er vitað að Satoshi Nakamoto kom að málinu en það er hugsanlega dulnefni eins eða fleiri aðila. Í heildina eru til 21 milljón Bitcoin og nú er búið að grafa 18 milljónir upp. Það er þetta takmarkaða magn sem gerir myntina vinsæla og verðmæta, að vissu leyti minnir hún á gull, það er bara ákveðið magn til.

Rafmyntir hafa sótt í sig veðrið á síðustu árum og eru orðnar ansi margar. Það er að sögn ekki flókið að búa til rafmynt en svo er annað mál hvort einhver vilji fjárfesta í henni.